Mgombea Urais apanga kumrejesha Milovan Simba

MMOJA wa wagombea wa nafasi ya Urais kwenye uchaguzi ujao wa Simba, amepanga kumrejesha nchini kocha wa zamani wa timu hiyo, Milovan Cirkovic endapo akishinda kiti hicho.

Simba inajiandaa kwa uchaguzi mkuu uliopangwa kufanyika Juni 29 jijini Dar es Salaam ambapo leo Jumamosi kamati ya uchaguzi itakutana kuhakiki fomu za wagombea Jumatatu majina halisi yatatangazwa kabla ya kuanza kupokea pingamizi Jumatano.

Habari za ndani kutoka kwenye kambi ya mgombea huyo maarufu na mwenye wapambe wengi wanaojipa nafasi kubwa ya kushinda, zinasema kwamba wao wana imani kubwa na Milovan zaidi ya kocha wa sasa, Zdravko Logarusic. 

Ingawa mgombea huyo alipobanwa na Mwanaspoti aligoma kunukuliwa kwa kuhofia kukatwa jina lake kwavile kampeni hazijaanza, Milovan alisema yupo tayari kurejea nchini kuifundisha Simba ingawa hakuna kiongozi yoyote aliyempigia simuhadi sasa.

Cirkovic aliyewahi kuinoa Simba kabla ya ujio wa Patrick Liewig msimu wa 2012/13, kwa sasa anaifundisha timu ya Taifa ya Myanmar ambayo iko kambini Thailand kujiandaa na mechi ya Kombe la Chalenji la Asia dhidi ya Maldives.

Kocha huyo alisema; “Nipo tayari kuachana na Myanmar ili nije kuifundisha Simba kama viongozi watakubaliana na mimi kuhusu maslahi na wakiniboreshea mkataba.”

Kabla ya kuondoka nchini, Logarusic ambaye mkataba wake wa miezi sita unafikia tamati mwishoni mwa mwezi huu, alifikia makubaliano ya kuendelea kuifundisha Simba na uongozi lakini kwa sharti la kusaini mkataba Julai atakaporejea.

Katibu Mkuu wa Simba, Ezekiel Kamwaga ameliambia Mwanaspoti ; “Kweli tulikubaliana baadhi ya vitu na Logarusic, lakini uongozi mpya ndiyo utakaoamua kama utaendelea naye au vinginevyo maana wao ndiyo wakaomlipa.”
source.www.mwanaspoti.co.tz