09 APR. Mnyika atwangwa faini ya Kiduku

Ni baada ya sherehe hizo zilizofanyika ukumbi wa Shaku Manzese; mzee aliyekuwa akifanya sherehe yake ya kuzaliwa ni Hamad Ukwesule, ambapo Mnyika alialikwa kuwa mgeni rasmi.

Si mwingine bali ni yule Mbunge wa Ubungo, John Mnyika, juzi alijigomboa kwa gharama ya sh 20,000, ili asicheze kiduku katika sherehe za kutimiza miaka 60 ya mmoja wa wazee wa Chama cha Demokrasia na Maendeleo (CHADEMA), katika jimbo hilo.

Boniface Jacob, ambaye ni Diwani wa Ubungo ndiye aliyekuwa Mshehereshaji wa shughuli hiyo, alitumia utaratibu wa kumuita mtu mmoja mmoja kwenda mbele kwa ajili ya kuonesha burudani na anayefanikiwa, anamtaja mtu mwingine kwa ajili ya kuendeleza burudani hiyo ukumbini huku wale wanaoshindwa wakilazimika kulipa faini.

Mbunge huyo wa Jimbo la Ubungo alisema hakuwa amejiandaa kwa ajili ya kucheza na kwamba hali hiyo ilikuwa ya kumshtukiza pale ukumbini.

“Mimi wangeniambia kama kuna nafasi ya kucheza ukumbini, mbona ningejiandaa tu….isipokuwa nilijua hapa ni sehemu ya kubadilishana mawazo pasipo kucheza,” alisema Mnyika.