Bendi ya muziki wa dansi ya Mashujaa Musica, imezidi kuibomoa bendi ya African Stars ‘Twanga Pepeta’ baada ya kumnyakua mnenguaji wake mahiri, Lilian Tungaraza ‘Internet’.
Mbali ya pigo hilo, pia Mashujaa ambayo hivi karibuni ilimnyakua kwa mbwembwe, mwimbaji na rapa mahiri, Charlz Baba, pia imemuongeza katika safu yake, mpiga gitaa mashuhuri aliyepata kuzitumikia bendi kadhaa, ikiwemo Twanga Pepeta, Ally Akida, ‘Tetenasi ya Jiniva’.
Akizungumza jijini Dar es Salaam jana, Meneja wa Mashujaa Band, Max Luhanga, alisema kwamba wameamua kuwachukua wanamuziki hao ili kuimarisha bendi yao katika idara hizo.
Alisema pamoja na kuimarisha idara hizo, pia wanaamini uzoefu na umahiri walionao wasanii hao, utasaidia kwa kiasi kikubwa kuongeza kiwango cha bendi yao ambayo kwa sasa imeingia rasmi katika ushindani wa kimuziki.
Aliongeza kuwa tayari wasanii hao wameishasaini mkataba wa kuitumikia bendi hiyo kwa miaka miwili ambapo onesho la utambulisho linatarajiwa kufanyika Jumatano ijayo kwenye ukumbi wa Nyumbani Lounge
No comments:
Post a Comment