29 FEB. KIINGILIO MECHI YA SIMBA NA KIYOVU CHATAJWA

Kiingilio cha chini katika mchezo wa marejeano wa kombe la shirikisho hatua ya awali baina ya Simba na Kiyovu ni Tsh 5000. Mchezo huo utachezwa saa 9 alaasiri siku ya jumapili machi 4 katika uwanja wa Taifa jijini Dar es salaam.

Katika mchezo huo ambao mshindi atakutana na timu ya ES Setif ya Algeria katika hatua ya pili kiingilio cha juu ni Tsh 30,000 katika VIP A, Tsh 15,000 kwa VIP B, wakati VIP C kingilio kimepangwa kuwa sh 10,000.

Viti vya Blue kingilio ni sh 8,000 wakati viti vya rangi ya Orange na mzunguko kiingilio kimepangwa kuwa sh 5,000.

Tiketi hizo zimepangwa kuanza kuuzwa siku ya Ijumaa Asubuhi, katika vituo vilevile vilivyotumika katika mchezo wa Yanga dhidi ya Zamalek. Vituo hivyo ni Zizou Fashion, Dar live Mbagala, Shule Ya Sekondari Benjamini Mkapa, Steers Mjini, Uwanja Wa Uhuru.

Katika mchezo wa awali uliopigwa nchini Rwanda, walitoka sare ya bao 1-1 hivyo Simba inahitaji sare yoyote ili iweze kusonga mbele kwenye michuano ya awali ya raundi ya kwanza ya Kombe la Shirikisho la Soka Barani Afrika CAF, ambapo atavaana na ES Setif ya Algeria.

Katika kuelekea mchezo huo wa marejeano Makamu Mwenyekiti wa Simba, Geofrey Nyange amesema kuwa, wachezaji wote wapo fiti na kwamba Haruna Moshi 'Boban', Amir Maftah na Juma Jabu wameanza mazoezi rasmi juzi na wanaendelea vizuri isipokuwa wachezaji wao waliokuwa kwenye timu ya Taifa na Emanuel Okwi anayeitumika Uganda Cranes.